صدق عشق
شعرین قالبی غزل
دئدیم من عاشق عشقم منه کسدن نیاز اولماز
دئدی کی عشقسیز بیر کس جهاندا سرفراز اولماز
دئدیم سینم یانیر غملن ندندیر شعله گورسانمیر
دئدی گر کوز سالا بیر اوت اونا شعله نیاز اولماز
دئدیم غرق اولدیم عشقینده هانی بس ساحلین یاریم
دئدی غرق اولمیش انسانه داخی ساحل نیاز اولماز
دئدیم کپریکلرین سانکی چالان مضراب اولوب قلبه
دئدی ساز اولماسا هئچ کیم اوره کدن نغمه ساز اولماز
دئدیم چک دارا منصورم اناالحق ورد آغزیمدیر
دئدی منصوره همپایه سن تک پابند ناز اولماز
دئدیم من وصلته یئتسم قانیمله دستماز آللام
دئدی وصلت نمازیچون نیاز دستماز اولماز
دئدیم گل قویزییوم عرشه سنی وصف ائیله ماقیمله
دئدی چیخسم گویه بیردن آیه گویدن نیاز اولماز
دئدیم فرهادتک دگلم اوزوم آهیمله داغ یاررام
دئدی شیرین اولا عشقین آهیندا چاره ساز اولماز
دئدیم قیشلار قابار ووردی دالینجا بس کی من گزدیم
دئدی قیش گئتمه میش آخر بو عالمده کی یاز اولماز
دئدیم جهانبخش ایشید پندیم وورولما عشق دلداره
دئدی عاشق اولان انسان جهانده پنده بازاولماز
«سید جهانبخش شفیعی»