سربست (سید جهانبخش شفیعی)
اوزاماندن کی من اوز سرریمی دنیایه آچاردیم
سوزی ائللرده سئچاردیم
ائلده داستانلار آچاردیم
آغلاییب سئل تک آخاردیم
داغا حسرتله باخاردیم
او شیرین خاطیره لر کی داغا باخدیقجا دوشردی یادیمه
یازیلردی آدیمه ،
اوزومی گوجلو ساناردیم
من او فرهادده گئدیب تیشه آلاردیم
داغی داغدان آرالاردیم
داغا بیر نعره سالاردیم
هانی او خسرو کی داستانده گتیرمیشدی نظامی
هانی مجنون کی اولوبدور ائله مشهور ائله نامی
هانی لیلی هانی بس الده کی جامی
هانی سازتئللی عاشیقلر کی اولوبلار منه هامی
سوزومی داغ ایشیدن کن ده گورردیم کی داغین رنگی سارالدی
چوبانین رنگی قارالدی
ساراسین سئللر آپاردی ؟
یا کی وحشت یئلی اوندان بئله دهشتلی باج آلدی ؟
***
ایندی سوز یازماده سوزلر درین اولسون
هاوالار قوی سرین اولسین
سوزویه ن مشترین اولسین
من کیمین سوزلرین اولسین
اوقده ر سویله میشم ، سوز منیم کسکین قلیجیمدی
منده ائل اوغلویام آذر منیم ائستکلی ائلیمدی
دولو حرمتله اولان ترکی منیم شانلی دیلیمدی
بو یاشیل اولکه منیم پسته دهن اینجه بئلیمدی
بو آخان گوز یاشی جوشغونلی سئلیمدی
***
ایندی بیزلر ده گرک فخر ائیلییاخ کل جهانه
هم صداقتله یاشاخ اولمییاخین شرره بهانه
سنده گل چکمه اوزون ائلده نهانه
گلگینن صدقیله رفتار ائیله چون صادق اولان خیر آپاریبدی
اولمیش اولسوندا آدی باخگینن البته قالیبدی
آدی گویدن اوجالیبدی
اودی دیللرده قالیبدی
سو صداقت گوجینن داشدا یول آچدی
صدق لقمانیدی باعث کی حق اونچوندا طبابتده یول آچدی (قول الله تعالی)
صدق عشقیدی کی فرهادین الینن گئدیب او داغدا یول آچدی
او گونون صدقینه خاطیردی کی چوللرده گول آچدی
آمما هر یولده گلن صادق اولایماز
هر طبیب آدلی آولان حاذق اولایماز
هر کیم عذراسی اولا وامق اولایماز
هرنه ساز تئللی اولان عاشق اولایماز
هر آچیق اللی اولان رازق اولایماز
بولارین حکمی ازلدن یازیلیبدی
بولارین مهری صداقت قلمینن قازیلیبدی
بولارین عشقینه دنیا دوزالیبدی
سوزو سوزدن ساز آلیبدی
بو (جهانبخشده) اولاردان رازآلیبدی
اودی هر سوزده توتوب بیر سوز آلیبدی